Асноўныя канцэпцыі сучаснай архітэктуры. Стылявая канцэпцыя.

У сучасным мастацтвазнаўстве для вывучэння архітэктуры як асобнага мастацкага накірунку выкарыстоўваюцца розныя мастацкія канцэпцыі. Мастацкая канцэпцыя з’яўляецца галоўным змястоўным кампанентам аналізу архітэктуры. Яна дазваляе вызначаць і характарызаваць спецыфічныя рысы архітэктурных пабудоў і збудаванняў, знаходзіць традыцыйныя і наватарскія рысы ў будынках розных эпох, вылучаць іх канструкцыйную, функцыянальную і эстэтычную вартасць.
Для сучаснай архітэктуры характэрныя чатыры асноўныя канцэпцыі. Мастацка-вобразная канцэпцыя разглядае архітэктуру як непадзельнае адзінства функцыянальных, канструкцыйна-тэхнічных і эмацыянальна эстэтычных элементаў, увасобленых у архітэктурных аб’ектах. Прасторавая канцэпцыя на першы план высоўвае такую характарыстыку архітэктуры, як “прасторавасць”, і разглядае кожную пабудову як прасторавую кампазіцыю ў трох вымярэннях. Канструкцыйна-тыпалагічная канцэпцыя засяроджвае ўвагу на аналізе канструкцыйных сістэм пабудоў.
Адной з найбольш распрацаваных і часта выкарыстоўваемых з’яўляецца стылявая канцэпцыя архітэктуры. Менавіта гэтай канцэпцыі і будзе прысвечана дадзеная работа.
Мэта работы – прааналізаваць стылявую канцэпцыю сучаснай архітэктуры.
Задачы:
1. Разгледзець сутнасць паняцця “стыль” у дачыненні архітэктуры.
2. Каротка ахарактарызаваць асноўныя архітэктурныя стылі.
3. Вызначыць недахопы стылявой канцэпцыі архітэктуры.

Адной з асноўных мастацкіх канцэпцый, якія выкарыстоўваюцца для вывучэння і аналізу архітэктуры, з’яўляецца стылявая канцэпцыя.
Вядучае паняцце для дадзенай канцэпцыі – паняцце “стыль”, якое ў дачыненні архітэктурнага мастацтва можна трактаваць як адзінства мастацкага светапогляду, якое адлюстроўвае эстэтычныя ідэалы свайго часу і ідэалогіі, ідэйна-мастацкі змест і эмацыянальныя характарыстыкі архітэктурных вобразаў.
Асноўнымі архітэктурнымі стылямі з’яўляюцца: раманскі, гатычны, стыль барока, класіцызм, мадэрн.
Да станоўчых бакоў стылявой канцэпцыі архітэктуры можна аднесці тое, што яна дазваляе даць дастаткова глыбокую, разнабаковую характарыстыку архітэктуры пэўнага гістарычнага перыяду.
У той жа час, гэтай канцэпцыяй ігнаруюцца шматлікія будынкі і пабудовы, якія немагчыма далучыць да якога-небудзь мастацкага стылю, дзейнасць архітэктурных аб’яднанняў, а таксама архітэктура асобных гістарычных перыядаў (першабытнага грамадства, старажытнага часу).
Сучасныя даследчыкі архітэктуры выказваюць меркаванне аб неабходнасці перагляду стылявой канцэпцыі і вызначэння двух “глабальных” стыляў у развіцці архітэктуры – класічная стылявая архітэктура і “сучасны рух” 20 стагоддзя.